एदे फोटू ल चपक के मुख्य पेज म लहुंटव—

शनिवार, 5 नवंबर 2016

राष्ट्रीय एकता दिवस के रूप म मनाइन लौह पुरूष के जनम दिन

राष्ट्रीय एकता दिवस के रूप म मनाइन लौह पुरूष के जनम दिन

अंजोर.रायगढ़। सरदार वल्लभ भाई पटेल के 141 वीं जयंती के मउका म रायगढ़ जिला प्रशासन कोति ले राष्ट्रीय एकता दौड़ के आयोजन करे गे रिहिसे। दौड़ के शुभारंभ केन्द्रीय इस्पात राज्यमंत्री विष्णुदेव साय ह रायगढ़ स्टेडियम म हरियर झंडा देखा के करिन। ये एकता दौड़ ह रायगढ़ स्टेडियम ले शुरू होगे कमला नेहरू पार्क म उरकीस। ये मउका म अपन विचार रखत  साय जी ह कार्यक्रम म जुरियाए पढ़इया लइका, महिला, अधिकारी-कर्मचारी अउ आम लोगन मन ल देवारी के बधाई दिस अउ किहिन के सरदार वल्लभ भाई पटेल के 141 वीं जयंती ल राष्ट्रीय एकता दिवस के रूप म पूरा भारत म मनाये जावथाबे। ओमन आगू किहिन के सरदार वल्लभ भाई पटेल के जनम 31 अक्टूबर 1875 के गुजरात के पाटीदार परिवार म होय रिहिसे। ओमन गांधी जी के विचार ले प्रेरित होके भारत के स्वतंत्रता आंदोलन म सक्रिय भागीदारी निभाइन। गुजरात के खेड़ा डिवीजन ले ओमन अंग्रेज मनके खिलाफ संघर्ष के शुरूआत करिन अउ सन् 1928 म किसान मनके हित खातिर गांधी जी के संग सत्याग्रह चलाइन जिहां उनला सरदार के उपाधि मिलिस। केन्द्रीय राज्यमंत्री ह जुरियाए जन समुह ल राष्ट्रीय एकता दिवस म किरिया तको खवाइन। कार्यक्रम म रायगढ़ कलेक्टर श्रीमती अलरमेलमंगई डी ह किहिन के सरदार वल्लभ भाई पटेल ह भारत देश के 500 ले आगर छोटे-बड़े रियाशत ल जोड़के अखण्ड भारत सिरजाये म अहम भूमिका निभाईन। राष्ट्रीय एकता दिवस के कार्यक्रम म विधायक सर्वश्री रोशन लाल अग्रवाल, सभापति सलीम नियारिया, जगन्नाथ पाणिग्राही, श्रीकांत सोमावार, राजेश शर्मा, सुभाष पाण्डेय, पूर्व महिला आयोग सदस्य श्रीमती शीला तिवारी, गुलाम रहमान, पूर्व महापौर महेन्द्र चौहथा, पुलिस अधीक्षक बी.एन.मीणा, एसडीएम प्रकाश सर्वे, खेल अधिकारी प्रमोद बैस के अलावा स्कूली लइका, स्काउट गाईड एनसीसी वाले लइका, शिक्षकगण अऊ आम नागरिक म जुरियाए रिहिन हाबे। 

टीकाकरण कार्यक्रम ल सफल बनाही ई-विन परियोजना

अंजोर.बिलासुर.ए। भारत सरकार डहर ले टीकाकरण कार्यक्रम ल अऊ बने करे खातिर अब ई विन (इलेक्ट्रॉनिक वैक्सीन ईन्टलीजेन्स नेटवर्क) नामक परियोजना लाने गे हावय जेमा स्मार्टफोन म ई विन एप्प के माध्यम ले वैक्सीन मांग, संधारण अउ वितरण प्रणाली म सुधार करके रियल टाईम स्टाक पोजीशन के अवलोकन करे जाही। जानकारी के मुताबिक ये ईविन साफ्वेयर के माध्यम ले वैक्सीन कोल्ड चैन स्टोर म क्षेत्रवार लाभार्थी मनके वास्तविक संख्या के अनुसार वैक्सीन के मांग अउ पूर्ति ल जानके हरेक वेक्सीन के कोल्डचैन स्टोर म स्टॉक पोजिशन, जिला से लेके राज्य स्तर म कोनो भी अधिकारी जानकारी ले सकही। ये ईविन साफ्टवेयर के लॉच होए ले शासन के वैक्सीन वितरण प्रणाली तो मजबूत होबे करही संगे-संग ओवर स्टॉक, वैक्सीन शार्टेज अउ वैक्सीन के वेस्टेज ल तको रोके म मदद मिलही। एजेंसी के बताये अनुसार ये परियोजना के अंतर्गत सबो कोल्ड चेन हेन्डल मनला एकक एण्डराइड स्मार्टफोन (लेनेवो ए 6000) डाटा पैक के साथ बांटे जावथाबे अउ ई विन एप्प ल चलाये खातिर कोल्ड चैन हेडलर अउ लिंक पर्सन ल दू दिनी प्रशिक्षण यूनाईटेड नेशन डवलेपेंट प्रोग्राम (यू.एन.डी.पी.) के सहयोग ले दे जाही।

राष्ट्रीय विधिक सेवा प्राधिकरण के निर्देश
उच्च न्यायालय जिला-तहसील मुख्यालय म 12 नवंबर के लोक अदालत
अंजोर.बिलासपुर ए.। छत्तीसगढ़ उच्च न्यायालय के संगे-संग प्रदेश के सबो जिला अउ तहसील मुख्यालय म 12 नवंबर के लोक अदालत के आयोजन करे जाही। ये संबंध म मुख्य सचिव ह मंत्रालय म राज्य शासन के बड़का अधिकारी मनके बइठका म लोक अदालत आयोजन के तैयारी के समीक्षा करत आवश्यक दिशा-निर्देश दिस। लोक अदालत म ज्यादा ले ज्यादा न्यायालयीन प्रकरण के निराकरण अउ लोक सेवा के अंतर्गत नागरिक मनला सुविधा देवाय अउ लोक अदालत के आयोजन के स्थानीय स्तर म व्यापक प्रचार-प्रसार करय ताकि लोगन मन येकर लाभ ले सकय। 
जानबा होवय के राष्ट्रीय विधिक सेवा प्राधिकरण के निर्देश म 12 नवंबर के पूरा देश म राष्ट्रीय लोक अदालत के आयोजन करे जावथाबे। जेमा जिला अउ तहसील न्यायालय, कलेक्टोरेट परिसर अउ तहसील कार्यालय म शिविर लगाके लोक अदालत आयोजित करके लंबित अदालती प्रकरण के निराकरण करे जाही। संगे-संग मनरेगा श्रमिक के मजदूरी भुगतान, वृद्धावस्था पेंशन के लंबित प्रकरण के निराकरण, फसल बीमा के भुगतान, राजस्व प्रकरण-नामांतरण, बंटवारा, सीमांकन, अतिक्रमण, असंगठित क्षेत्र के मजदूर अउ कर्मकार पंजीयन, बीमा अउ भुगतान, जन्म प्रमाण पत्र, मृत्यु प्रमाण पत्र, आय, जाति प्रमाण पत्र, निवास प्रमाण पत्र, विवाह पंजीयन, शहरी अउ ग्रामीण क्षेत्र म बिजली बिल के बकाया राशि के वसूली, बिजली चोरी ले संबंधित प्रकरण, नल कनेक्शन, वन अधिकार पट्ट वितरण, तेन्दूपत्ता संग्राहक मनके बीमा राशि के भुगतान, वन्यप्राणी खास कर हाथी के उत्पाद ले होय नकसानी के बीमा राशि के भुगतान, प्रधानमंत्री बीमा सुरक्षा योजना, प्रधानमंत्री जीवन ज्योति योजना अउ अटल पेंशन योजना जइसन अनेक विभाग के योजना के लाभ शिविर माध्यम ले दे जाही। येकर अलावा लोक अदालत म विद्युत विभाग, राजस्व विभाग, खनिज विभाग, स्वास्थ्य विभाग, वाणिज्यिक-कर, आबकारी विभाग, यातायात नियम के उल्लंघन, अऊ आन न्यायालयीन प्रकरण के निराकरण लोक अदालत म होही।

गर्मी म धान बर नइ मिलय बिजली

अंजोर.बिलासपुर। जिला म कम बरसा अउ पीये के पानी के कमी अउ निस्तारी पानी के किल्लत ल देखत किसान मन ला धान फसल नइ बोये बर केहे गे हावय। काबर के बिजली कटौती करे जाही, जेमा किसान मनके फसल तको प्रभावित होही। किसान मन गर्मी म धान फसल के बजाये कम पानी वाला दलहन, तिलहन लगावए। बिलासपुर जिला कलेक्टर ह कृषि विभाग के अधिकारी मनला तको निर्देशित करे हावय के ओमन किसान मनला गर्मी म धान के जगह दलहन-तिलहन फसल उगाये खातिर प्रोत्साहित करय।

लाईव्हलीहूड कॉलेज सोसायटी के खाली पद म भर्ती खातिर आवेदन ऑनलाईन

अंजोर.अम्बिकापुर। जिला पंचायत सरगुजा ले मिले जानकारी म राज्य परियोजना लाईव्हलीहुड कॉलेज सोसायटी डहर ले राज्य स्तरीय पद सूचना प्रौद्योगिकी के उप मुख्य कार्यपालन अधिकारी, जिला स्तरीय प्राचार्य अउ सहायक परियोजना अधिकारी के पद म संविदा भर्ती खातिर व्यावसायिक परीक्षा मण्डल कोति ले परीक्षा आयोजित करे जाही। ऑनलाईन आवेदन 4 नवंबर तक भरे जाही अउ परीक्षा 20 नवंबर 2016, रविवार के रायपुर म होही। लोगन अऊ ज्यादा जानकारी वेबसाईट सीजीव्यापम.च्वाईस.जीओव्ही.इन अउ विभाग के वेबसाईट एसपीएलसी.सीजीस्टेट.जीओव्ही.इन म देख सकत हावय। 

बस्तर बटालियन म 750 चयनित युवा मनके 6 नवंबर के होही लिखित परीक्षा

अंजोर.बीजापुर। बस्तर बटालियन खातिर जीडी पुरुष के 119 अउ जीडी महिला के 59 पद स्वीकृत करे गे हावय येकर अलावा ट्रेड्समेन पुरुष के 20 अउ ट्रेड्समेन महिला के 9 पद म अब लघियात भर्ती होही। जिला के 1042 दावेदार मन शारीरिक दक्षता म भाग लिन, जेमा जीडी म 382 पुरुष अउ 143 महिला के चयन लिखित परीक्षा खातिर होय हाबे। लिखित परीक्षा 6 नवंबर के जिला मुख्यालय म होही। जीडी आरक्षक मनके 10 बजे से 12 बजे तक अउ ट्रेड्समेन के परीक्षा संझा 03 बजे ले 05 बजे तक होही। लिखित परीक्षा पास करइया मनके मेडिकल परीक्षण 30 नवंबर से 14 दिसंबर तक करे जाही तेकर पाछू बस्तर बटालियन म चयन होवइया के सूची जारी होही।

सतर्कता जागरूकता सप्ताह

अंजोर.जांजगीरचांपा। सतर्कता जागरूकता सप्ताह के अंतर्गत जिला कलेक्टोरेट म कलेक्टर डॉ एस. भारतीदासन के सियानी म अधिकारी अउ कर्मचारी मनला कार्यकलाप के हरेक क्षेत्र म ईमानदारी अउ पारदर्शिता बनाए राखे के शपथ देवाय गिस। कलेक्टर डॉ. भारतीदासन के संग कर्मचारी मन किरिया खाइन के भ्रष्टाचार उन्मूलन खातिर निर्बाध रूप ले काम करत संगठन के विकास अउ प्रतिष्ठा ल धियान म राखत काम करबोन। 

धान उपार्जन केन्द म लाउडस्पीकर प्रणाली लागू करे के निर्देश

अंजोर.रायगढ़। रायगढ़, सारंगढ़, खरसिया, घरघोड़ा, धरमजयगढ़ अउ लैलूंगा के अनुविभागीय अधिकारी राजस्व मनला किसान के सुविधा ल देखत जिला के 121 धान केन्द म लाउडस्पीकर प्रणाली (एनाउन्समेंट सिस्टम) लागू करे के निर्देश देवत कलेक्टर ह केहे हावय के हरेक दिन सबो धान खरीदी केन्द्र म नोडल अधिकारी कोति ले लाउडस्पीकर ले धान खरीदी के फड़ म माइक के माध्यम से घोषणा करे जाए के धान खरीदी शुरू होवथाबे। यहू बात के धियान राखय के कोनो बिचौलिया या कोचिया मन किसान मनके माध्यम ले सोसायटी म धान बेचे के कोशिश झिन करय। संझा 5.30 बजत ले जतका भी किसान के कांटा होही ओतका के समिति मुख्यालय ले चेक वितरण कराके चेक लेगे के जानकारी देवय। 


कोई टिप्पणी नहीं:

एक टिप्पणी भेजें